ഉദയംപേരൂർ നീതു വധക്കേസ് പ്രതി ബിനുരാജ് തൂങ്ങി മരിച്ച നിലയിൽ

ഉദയംപേരൂർ നീതു വധക്കേസ് പ്രതി ബിനുരാജിനെ തൂങ്ങി മരിച്ച നിലയിൽ കണ്ടെത്തി. കേസിന്റെ വിചാരണ നാളെ തുടങ്ങാനിരിക്കെയാണ് ബിനുരാജിന്റെ മരണം. ഉദയംപേരൂർ ഫിഷർമെൻ കോളനിക്കു സമീപം മീൻകടവിൽ പള്ളിപ്പറമ്പിൽ ബാബു, പുഷ്പ ദമ്പതികളുടെ ദത്തുപുത്രിയായ നീതു (17)വിനെ 2014 ഡിസംബർ 18നാണ് കാമുകനായ ബിനുരാജ് വെട്ടികൊലപ്പെടുത്തിയത്.

നീതു പത്താം ക്ലാസിൽ പഠിക്കുമ്പോഴാണ് ബിനുരാജുമായി പ്രണയത്തിലായത്. പ്രായപൂർത്തിയാകാത്ത ദത്തുപുത്രി ഇതര മതത്തിൽപെട്ട ഏറെ മുതിർന്ന ആളെ പ്രണയിക്കുന്നത് വീട്ടുകാർ വിലക്കി. ബിനുരാജും നീതുവും ഒന്നിച്ച് ജീവിക്കാൻ ശ്രമിച്ചതോടെ വീട്ടുകാർ പൊലീസിൽ പരാതിപ്പെട്ടു. തുടർന്ന് ഉദയംപേരൂർ സ്‌റ്റേഷനിൽ രണ്ടു പേരെയും വിളിച്ചുവരുത്തി. പ്രണയമാണെന്നും വിവാഹം കഴിക്കാൻ തയാറാണെന്നും ഇവർ പൊലീസിനോട് പറഞ്ഞു. നീതുവിന് 18 വയസ് തികഞ്ഞ ശേഷം വിവാഹം നടത്താമെന്ന ധാരണയിൽ പിരിയുകയായിരുന്നു.

എന്നാൽ പിന്നീട് മനംമാറ്റമുണ്ടായ നീതു ബിനുരാജിനെ അവഗണിക്കുകയായിരുന്നു. 2014 ഡിസംബർ 18ന് രക്ഷിതാക്കളായ ബാബുവും പുഷ്‌പയും ജോലിക്ക് പോയ ശേഷം വീട്ടിൽ തനിച്ചായിരുന്ന നീതുവിനെ കൊടുവാളുമായെത്തിയ ബിനുരാജ് വെട്ടിക്കൊലപ്പെടുത്തുകയായിരുന്നു.

തൃപ്പൂണിത്തുറ സെന്റ് ജോർജ് സ്‌കൂളിലെ ജീവനക്കാരായ ബാബുവിന്റെയും പുഷ്പയുടെയും മകൾ എലിസബത്ത് (നീതു) നാലുവയസുള്ളപ്പോൾ വീടിന്റെ ചുറ്റുമതിൽ ഇടിഞ്ഞു വീണു മരിച്ച ശേഷമാണ് രണ്ടു വയസുള്ള പെൺകുഞ്ഞിനെ അനാഥാലയത്തിൽ നിന്നു ദത്തെടുത്തു നീതുവെന്നു തന്നെ പേരിട്ടു വളർത്തിയത്. ഇവർക്കു നിബു, നോബി എന്നീ രണ്ട് ആൺമക്കൾ കൂടിയുണ്ട്.