ഭാരത് ബന്തിൽ വ്യാപക അക്രമം, വെടിവയ്‌പ്: ഒമ്പത് പേർ കൊല്ലപ്പെട്ടു

പട്ടിക ജാതി, പട്ടിക വർഗ വിഭാഗങ്ങൾക്കെതിരായ അതിക്രമം സംബന്ധിച്ച പരാതികളിൽ ഉടൻ അറസ്റ്റ് പാടില്ലെന്ന സുപ്രീം കോടതി ഉത്തരവിൽ പ്രതിഷേധിച്ച് ദളിത് സംഘടനകൾ നടത്തുന്ന ഭാരത് ബന്തിൽ വ്യാപക അക്രമം. ബന്തിനിടെ മദ്ധ്യപ്രദേശിൽ ഉണ്ടായ അക്രമങ്ങളിൽ മരണം ഒമ്പതായി. രാകേഷ് ജാദവ്,​ ഗ്വാളിയോർ സ്വദേശിമാരായ ദീപക് സിംഗ്,​ മഹാവീർ രാജാവത്,​ ഭിന്ദ് സ്വദേശികളായ ആകാശ് മെഹ്ഗാവ്,​ രാഹുൽ പതക് എന്നിവരാണ് മരിച്ചവർ. ഒരാളെ തിരിച്ചറിഞ്ഞിട്ടില്ല. മുപ്പതോളം പേർക്ക് പരിക്കേറ്റിട്ടുണ്ട്.

സംഘർഷം വ്യാപിച്ചതോടെ ഗ്വാളിയോർ,​ മൊറേന,​ ഭിന്ദ് എന്നിവിടങ്ങളിൽ ഇന്റർനെറ്റ് സേവനങ്ങൾ ജില്ലാ ഭരണകൂടം താൽക്കാലികമായി നിരോധിച്ചു. സംഘർഷ പ്രദേശങ്ങളിൽ കൂടുതൽ പൊലീസിനെ വിന്യസിച്ചിട്ടുണ്ട്. അതേസമയം,​ ഗ്വാളിയോറിൽ പ്രതിഷേധ പ്രകടനത്തിനിടെ കൈത്തോക്കുപയോഗിച്ച് അക്രമി വെടിവയ്ക്കുന്നതിന്റെ വീഡിയോ ദൃശ്യം വാർത്താ ഏജൻസിയായ എ.എൻ.ഐ പുറത്ത് വിട്ടു.

രാജസ്ഥാനിലെ ബാർമേറിൽ കാറുകളും കെട്ടിടങ്ങളും പ്രതിഷേധക്കാർ അഗ്നിക്കിരയാക്കി. ഒഡിഷയിലെ സാംബൽപുരിൽ സമരക്കാർ ട്രെയിൻ തടഞ്ഞു. അഹമ്മദാബാദിൽ ബസുകൾക്ക് നേരെ കല്ലേറുണ്ടായതിനെ തുടർന്ന് ബി.ആർ.ടി.എസ് സർവീസുകൾ താൽക്കാലികമായി നിറുത്തിവച്ചു. പലയിടത്തും ബസിന്റെ ടയറുകളിലെ കാറ്റ് പ്രതിഷേധക്കാർ അഴിച്ചുവിട്ടു. ഭവനഗറിൽ പ്രതിഷേധക്കാരെ പിരിച്ചുവിടാൻ പൊലീസ് ലാത്തിവീശി.

പഞ്ചാബിൽ മുൻകരുതലിന്റെ ഭാഗമായി പൊതുഗതാഗതം റദ്ദാക്കി. വിദ്യാഭ്യാസ സ്ഥാപനങ്ങൾക്ക് അവധി നൽകി. പഞ്ചാബിലെ കപുർത്തലയിലെ സുഭാൻപുറിൽ പ്രതിഷേധക്കാർ ജലന്ധർ അമൃത്സർ ദേശീയപാതയും ഹോഷിയാപുരിലെ പാണ്ഡ്യ ബൈപ്പാസും പ്രതിഷേധക്കാർ ഉപരോധിച്ചു. ബീഹാറിൽ ട്രെയിൻ തടഞ്ഞതിനെ തുടർന്ന് പട്ന, ഗയ, ജെഹ്നാബാദ്, ഭഗൽപുർ, അറ, ഡർഭൻഗ, അരാറിയ, നളന്ദ, ഹജിപുർ റെയിൽവേ സ്റ്റേഷനുകളിലെത്തിയവർ വലഞ്ഞു. ഗുജറാത്തിലെ സൗരാഷ്ട്ര,​ ഭവ്നാഗർ,​ അമ്രേലി,​ ഗിർ സോമനാഥ് ജില്ലകളിലും സംഘർഷം പടർന്നു പിടിച്ചിട്ടുണ്ട്.