SDPI ബന്ധത്തില്‍ CPM ൻറെ ഇരട്ടത്താപ്പ്; വെമ്പായത്ത് പഞ്ചായത്ത് ഭരണം പിടിക്കാന്‍ SDPI പിന്തുണ

അഭിമന്യുവിന്റെ മരണവുമായി ബന്ധപ്പെട്ട് സിപിഎം എസ്ഡിപിഐയോട് കാണിക്കുന്നതു തനി ഇരട്ടത്താപ്പാണ് എന്ന് തെളിയിക്കുന്ന റിപ്പോർട്ടുകളാണ് ഇപ്പോള്‍ പുറത്ത് വരുന്നത്. എസ്ഡിപിഐ പ്രവര്‍ത്തകരുടെ കൊലക്കത്തിക്ക് ഇരയായ മഹാരാജാസ് കോളേജിലെ അഭിമന്യുവിന്റെ മരണത്തില്‍ സംസ്ഥാനമൊട്ടാകെ വ്യാപക റെയ്ഡ് നടക്കുമ്പോളാണ് വെമ്പായം പഞ്ചായത്തില്‍ ഭരണത്തിനായി സിപിഎം-എസ്ഡിപിഐ സൗഹൃദം സ്ഥാപിച്ചത്. ഈ അപൂര്‍വമായ കൂട്ടുകെട്ട് ഉണ്ടായത് അഭിമന്യു മരിച്ച അതേദിവസം തന്നെയാണെന്നാണ് പ്രത്യേകത.

ഇതോടെ വെമ്പായം പഞ്ചായത്ത് ഭരണം എസ്.ഡി.പി.ഐയുടെ പിന്തുണയോടെ സി.പി.എം വീണ്ടും തിരിച്ചുപിടിച്ചു. നേരത്തെ കോണ്‍ഗ്രസിനൊപ്പം ചേര്‍ന്ന് ബി.ജെ.പിയും എസ്.ഡി.പിയും സി.പി.എം പഞ്ചായത്ത് പ്രസിഡന്റിനെ പുറത്താക്കിയിരുന്നു. ഇത് ഏറെ വിവാദവുമായിരുന്നു. ഇന്ന് നടന്ന പ്രസിഡന്റ് തെരഞ്ഞെടുപ്പില്‍ എസ്.ഡി.പി.ഐ അംഗം സി.പി.എം പ്രസിഡന്റ് സ്ഥാനാര്‍ഥിക്ക് വോട്ട് ചെയ്തു. ഇതോടെയാണ് ഭരണം സി.പി.എമ്മിന് തിരികെ ലഭിച്ചത്. ബി.ജെ.പിയുടെ രണ്ട് അംഗങ്ങള്‍ വോട്ടെടുപ്പില്‍നിന്ന് വിട്ടുനിന്നു.

വെമ്പായം പഞ്ചായത്ത് പ്രസിഡന്റ് സി.പി.എമ്മിലെ ബി.എസ് ചിത്രലേഖയ്‌ക്കെതിരെ കോണ്‍ഗ്രസ് അവതരിപ്പിച്ച അവിശ്വാസ പ്രമേയം ബി.ജെ.പി, എസ്.ഡി.പി.ഐ അംഗങ്ങളുടെ പിന്തുണയോടെ പാസായിരുന്നു. ഇരുപത്തിയൊന്നംഗ ഭരണസമിതിയില്‍ എട്ട് കോണ്‍ഗ്രസ് അംഗങ്ങളും രണ്ട് ബി.ജെ.പി അംഗങ്ങളും ഒരു എസ.ഡി.പിഐ അംഗവും അവിശ്വാസത്തിന് അനുകൂലമായി വോട്ട് ചെയ്്തു. എല്‍.ഡി.എഫിന് പത്ത് അംഗങ്ങളാണുള്ളത്. കേവല ഭൂരിപക്ഷമില്ലാതെയാണ് എല്‍.ഡി.എഫ് ഭരണം നടത്തിയിരുന്നത്. എസ്.ഡി.പി.ഐ പിന്തുണക്കുകയും ബി.ജെ.പി വിട്ടുനില്‍ക്കുകയും ചെയ്തതോടെ പ്രസിഡന്റ് പദവി സി.പി.എമ്മിന് തന്നെ തിരികെ ലഭിക്കുകയായിരുന്നു.