പ്രളയത്തിന് പിന്നാലെ ഗതാഗത മാർഗങ്ങളും നിലയ്‌ക്കുന്നു; ആലുവയിൽ രാവിലെ 1500 ഭക്ഷണ പാക്കറ്റുകൾ ഹെലികോപ്റ്ററിൽ വിതരണം ചെയ്തു

മാഞ്ഞാലി കാലടി ആലുവ ടൗൺ എന്നിവിടങ്ങളിൽ ഇന്ന് രാവിലെ 1500 ഭക്ഷണ പാക്കറ്റുകൾ ഹെലികോപ്റ്ററിൽ വിതരണം ചെയ്തു. 7500 പാക്കറ്റുകൾ കൂടി ഉടനെ വിതരണംചെയ്യും വൈകിട്ട് ഇരുപതിനായിരം ഭക്ഷണപ്പൊതികൾ വിതരണം ചെയ്യും. രക്ഷാപ്രവർത്തനത്തിന് ഹെലികോപ്റ്ററുകൾ എത്തുമ്പോൾ സേനാംഗങ്ങളുടെ നിർദേശം പാലിച്ച് അവരുമായി സഹകരിക്കണമെന്ന് ജില്ലാ കളക്ടർ അഭ്യർത്ഥിച്ചു.

പ്രളയം വിതച്ച ദുരിതത്തിനൊപ്പം ഗതാഗത മാർഗങ്ങൾ കൂടി പൂർണമായും സ്തംഭിച്ചത് കേരളത്തിന് കൂടുതൽ തിരിച്ചടിയായി. നിലവിൽ മദ്ധ്യ കേരളവും തെക്കൻ കേരളവും തമ്മിൽ ഒറ്റപ്പെട്ട നിലയിലാണ്. ഇതിനൊപ്പം തോട്ടപ്പള്ളി സ്പിൽവേ തുറക്കുമെന്ന മുന്നറിയിപ്പിനെ തുടർന്ന് രാവിലെ 11 മണി മുതൽ തിരുവനന്തപുരം – എറണാകുളം ദേശീയ പാതയിൽ ഗതാഗതം പൂർണമായും നിരോധിക്കും. കൊല്ലം ജില്ലാ അതിർത്തിയിൽ വച്ച് വാഹനങ്ങളെ തടയാൻ പൊലീസിന് ജില്ലാ ഭരണകൂടം നിർദ്ദേശം നൽകിയിട്ടുണ്ട്. തിരുവനന്തപുരത്ത് നിന്നും കോട്ടയം വഴിയുള്ള ട്രെയിൻ സർവീസുകളും പൂർണമായും റദ്ദാക്കിയിട്ടുണ്ട്. ആലപ്പുഴ വഴി നാമമാത്ര ട്രെയിനുകൾ മാത്രമാണ് സർവീസ് നടത്തുന്നത്.

അതിനിടെ മണ്ണിടിഞ്ഞും വെള്ളമൊഴുകിയും റോഡുകൾ തകർന്നതും ദുരിതം ഇരട്ടിയാക്കി. സംസ്ഥാനത്തിന്റെ പലയിടങ്ങളിലും ഇന്ധനക്ഷാമം രൂക്ഷമാണെന്നാണ് വിവരം. പ്രതികൂല സാഹചര്യത്തിൽ കെ.എസ്.ആർ.ടി.സിക്ക് പൂർണ തോതിൽ സർവീസ് നടത്താൻ ആകുന്നില്ല. എന്നാൽ കോർപ്പറേഷന് ഇന്ധനക്ഷാമം ഇല്ലെന്നാണ് കെ.എസ്.ആർ.ടി.സി അധികൃതർ നൽകുന്ന വിവരം. എന്നാൽ കോർപ്പറേഷന്റെ മിക്ക ഡിപ്പോകളും വെള്ളത്തിനടിയിലാണ്. ഇവിടത്തെ വാർത്താ വിനിമയ സംവിധാനങ്ങളും തകരാറിലായത് സർവീസുകൾ പുനസ്ഥാപിക്കാൻ വൻ തിരിച്ചടിയാണ്.

അതേസമയം, പ്രതികൂല സാഹചര്യത്തിലും പരമാവധി സർവീസുകൾ നടത്താനാണ് പദ്ധതിയെന്ന് കെ.എസ്.ആർ.ടി.സി അറിയിച്ചു. എന്നാൽ യാത്രക്കിറങ്ങുന്നതിന് മുമ്പ് സർവീസുകൾ നടത്തുന്നുണ്ടോയെന്ന് ഉറപ്പ് വരുത്തണമെന്നും കോർപ്പറേഷൻ കൂട്ടിച്ചേർത്തു. കെ.എസ്.ആ.ർടി.സിയുടെ കൺട്രോൾ റൂം നമ്പരുകളായ O471-2463799, 9447071021 എന്നിവയിലും വിവരങ്ങൾ ലഭ്യമാണ്