കുംഭമേളയ്ക്ക് നഗരം അലങ്കരിക്കാൻ നെഹ്‌റുവിന്റെ പ്രതിമ നീക്കം ചെയ്തു; ശക്തമായ പ്രതിഷേധം

കുംഭമേളയോട് അനുബന്ധിച്ച് നഗരം അലങ്കരിക്കുന്നതിനും മോഡികൂട്ടുന്നതിനുമായി പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിന്റെ പ്രതിമ നീക്കം ചെയ്തു. അലഹബാദിലെ ബല്‍സാന്‍ ചൗരയിലുണ്ടായിരുന്ന പ്രതിമയാണ് നീക്കം ചെയ്തതെന്ന് അധികൃതര്‍ അറിയിച്ചു. അടുത്ത വര്‍ഷമാണ് കുംഭമേള. എന്നാല്‍, നെഹ്‌റുവിന്റെ പ്രതിമ നിന്നിരുന്ന അതേ റോഡിലുള്ള ആര്‍എസ്എസ് ആചാര്യന്‍ ദീന്‍ ദയാല്‍ ഉപാധ്യായയുടെ പ്രതിമ നീക്കം ചെയ്തിട്ടില്ല. ഇതിനെതിരെ പ്രിഷേധവുമായി കോണ്‍ഗ്രസ് രംഗത്തെത്തി.

രാജ്യത്തിന്റെ മുന്‍ പ്രധാനമന്ത്രിയെ അപമാനിക്കുന്ന നടപടിയാണിതെന്ന് കോണ്‍ഗ്രസ് ആരോപിച്ചു. നടപടിക്കെതിരെ കോണ്‍ഗ്രസും സമാജ് വാദി പാര്‍ട്ടി പ്രവര്‍ത്തകരും പ്രതിഷേധ പ്രകടനം സംഘടിപ്പിച്ചു. പ്രവര്‍ത്തകര്‍ പ്രതിമ നീക്കം ചെയ്യാനെത്തിയ ക്രെയിന്‍ തടഞ്ഞ് മുഖ്യമന്ത്രി യോഗി ആദിത്യനാഥിനെതിരെ മുദ്രാവാക്യം വിളിച്ചു.

ദീന്‍ ദയാല്‍ ഉപാധ്യായയുടെ പ്രതിമ എന്തു കൊണ്ട് നീക്കം ചെയ്തില്ലെന്ന പ്രതിഷേധക്കാരുടെ ചോദ്യത്തിന് അധികൃതര്‍ മറുപടി നല്‍കിയിട്ടില്ല. എന്നാല്‍, നെഹിറുവിന്റെ പ്രതിമ റോഡിന്റെ മധ്യത്തിലായിരുന്നുവെന്നും അടുത്തുള്ള പാര്‍ക്കിലേക്ക് മാറ്റി സ്ഥാപിക്കുമെന്നുമാണ് അധികൃതരുടെ വിശദീകരണം.

മലയാളത്തിലെ ഓണ്‍ലൈന്‍ ന്യൂസ്‌ പോര്‍ട്ടലുകള്‍; ഓൺലൈൻ പോർട്ടൽ തുടങ്ങാൻ താത്പര്യമുള്ളവർക്ക് കുറഞ്ഞ ചിലവിൽ വെബ് ഡിസൈനിങ്ങിനും ഫ്രീ സർവീസിങ്ങിനും ഫോൺ: 6282485622