ശബരിമലയിൽ സ്ത്രീകളെ അപമാനിച്ച ഒരുത്തനെയും വെറുതെവിടില്ല എന്ന് മന്ത്രി. ജി. സുധാകരൻ

ശബരിമലയിൽ അക്രമം കാട്ടിയ ഒരുത്തനെയും വെറുതെവിടില്ല എന്ന് മന്ത്രി. ജി. സുധാകരൻ. ക്ഷേത്രപ്രവേശനവിളംബരത്തിന് മുമ്പ് കറുത്ത നിറക്കാരനായ നായർക്ക് പോലും ക്ഷേത്രങ്ങളിൽ പ്രവേശനം ഉണ്ടായിരുന്നില്ലെന്ന വസ്തുത ശബരിമലയുടെ പേരിൽ ഇപ്പോൾ വിപ്ലവം ഉണ്ടാക്കാൻ ശ്രമിക്കുന്നവർ വിസ്മരിക്കുകയാണെന്ന് മന്ത്രി ജി. സുധാകരൻ പറഞ്ഞു.

ശബരിമലയിൽ പ്രായമായ അമ്മമാരെ പോലും സമരക്കാർ അപമാനിക്കാൻ മടികാണിച്ചിട്ടില്ല. അവിടെ വീണ അമ്മമാരുടെ കണ്ണീരിന്റെ ഫലം ഇക്കുട്ടർ അനുഭവിക്കും, ശബരിമലയിൽ അക്രമം കാട്ടിയ ആരെയും വെറുതെവിടില്ല. അമ്പലം സ്വന്തമാണെന്നുകരുതുന്ന തന്ത്രിമാരും, രാജ ഭരണം ഒരു ഭൂതകല ചരിത്രമാണെന്ന് അറിയാത്ത രാജാക്കന്മാരും കോടതി വിധി നടപ്പാക്കില്ലെന്ന് അഹങ്കരിക്കുന്ന നേതാക്കന്മാരും കേരളത്തിന്റെ നവോത്ഥാനത്തിനുവേണ്ടി നടന്നിട്ടുള്ള സമരങ്ങളെ വിസ്മരിക്കുന്നവരും സത്യത്തെ നിരാകരിക്കുന്നവരുമാണെന്ന് മന്ത്രി പറഞ്ഞു.

അതിനിടയിൽ ശബരിമലയിൽ യുവതികൾ പ്രവേശിക്കുന്നത് തടയുന്നതുമായി ബന്ധപ്പെട്ട് സംസ്ഥാനത്തിന്റെ വിവിധ ഭാഗങ്ങളിൽ നടന്ന അക്രമസംഭവങ്ങളിൽ 452 കേസുകളിലായി 2061 പേർ അറസ്റ്റിലായി. സുപ്രീംകോടതി വിധി നടപ്പാക്കുന്നതിന് കഴിഞ്ഞ ദിവസം തിരുവനന്തപുരത്ത് മുഖ്യമന്ത്രി പിണറായി വിജയൻ വിളിച്ചു ചേർത്ത ഉന്നത പൊലീസ് ഉദ്യോഗസ്ഥരു‌ടെ യോഗത്തിൽ നൽകിയ നിർദ്ദേശത്തെത്തുടർന്നാണ് അറസ്റ്റ്.

പത്തനംതിട്ട ജില്ലയിൽ മാത്രം ഇന്നലെ വരെ 58 കേസുകളിൽ 153 പേർ അറസ്റ്റിലായി. ഇതിൽ 56 പേരെ ജാമ്യമില്ലാ വകുപ്പ് പ്രകാരം റിമാൻഡ് ചെയ്തു. തുലാമാസ പൂജയ്ക്ക് നട തുറന്ന ദിവസം മുതലുണ്ടായ സംഘർഷത്തിൽ ഉൾപ്പെട്ടവരാണ് അറസ്റ്റിലായിരിക്കുന്നത്. അക്രമികളെ കഴിഞ്ഞ ദിവസങ്ങളിലും ഇന്ന് പുലർച്ചയെുമായി വീടുകളിൽ നിന്ന് അറസ്റ്റ് ചെയ്യുകയായിരുന്നു.

.