പ്രശസ്ത ഛായാഗ്രാഹകന്‍ രാമചന്ദ്ര ബാബു അന്തരിച്ചു

പ്രശസ്ത ചലച്ചിത്ര ഛായാഗ്രാഹകനും സംവിധായകനുമായ രാമചന്ദ്ര ബാബു (72) അന്തരിച്ചു. ഹൃദ്രോഗബാധയെ തുടര്‍ന്ന് കോഴിക്കോട് മെഡിക്കല്‍ കോളേജിലായിരുന്നു അന്ത്യം. ഒരു സിനിമയുടെ ചിത്രീകരണവുമായി ബന്ധപ്പെട്ട് കോഴിക്കോട്ടെത്തിയ അദ്ദേഹം കുഴഞ്ഞുവീഴുകയായിരുന്നു. ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല.

പൂനെ ഫിലിം ഇന്‍സ്റ്റിറ്റ്യൂട്ടില്‍ നിന്ന് ഛായാഗ്രഹണം പഠിച്ച രാമചന്ദ്ര ബാബു പുണെയിലെ സഹപാഠി ജോണ്‍ അബ്രഹാമിന്റെ ചിത്രത്തിലൂടെയാണ് വെള്ളിത്തിരയിലെത്തിയത്. വിദ്യാര്‍ഥികളെ ഇതിലെ ഇതിലെയായിരുന്നു ആദ്യ ചിത്രം. 

മലയാളം, തമിഴ്, തെലുങ്ക് ഭാഷകളിലായി 125 ഓളം സിനിമകൾക്ക് ക്യാമറ ചലിപ്പിച്ചിട്ടുണ്ട്. മലയാളത്തിൽ പ്രമുഖ സംവിധായകർക്കൊപ്പം പ്രവർത്തിച്ചു. യവനിക, കന്മദം, പടയോട്ടം, പാളങ്ങൾ, രതിനിർവേദം, ഒരു വടക്കൻ വീരഗാഥ, ചാമരം, ഗസൽ, വെങ്കലം, സല്ലാപം തുടങ്ങിയവ ശ്രദ്ധേയ സിനിമകളാണ്. നാലു സംസ്ഥാന പുരസ്കാരങ്ങൾ ലഭിച്ചിട്ടുണ്ട്.