കോളേജിൽ വിദ്യാർത്ഥിനികളുടെ അടിവസ്ത്രം അഴിപ്പിച്ച് പ്രിൻസിപ്പാളിന്റെ ആർത്തവ പരിശോധന

ഗുജറാത്തിലെ വനിതാ കോളേജിൽ വിദ്യാർത്ഥിനികളുടെ വസ്ത്രം അഴിപ്പിച്ച് പ്രിൻസിപ്പൽ ആർത്തവ പരിശോധന നടത്തി. ഭുജ്ജിലെ ശ്രീ സഹജാനന്ദ് ഗേൾസ് ഇൻസ്റ്റിട്യൂട്ടിലാണ് സംഭവം നടന്നത്. ആർത്തവമുള്ള കുട്ടികൾ ആർത്തവമുള്ള സമയത്ത് ഹോസ്റ്റലിന്റെ അടുക്കളയിൽ കയറി എന്നാരോപിച്ചാണ് പ്രിൻസിപ്പൽ കോളേജിലെ 68 വിദ്യാർത്ഥിനികളുടെ വസ്ത്രം ഉരിഞ്ഞ് പരിശോധന നടത്തിയത്. ഇക്കാര്യം പുറത്ത് പറഞ്ഞാൽ പ്രത്യാഘാതങ്ങൾ നേരിടേണ്ടി വരുമെന്ന് കോളേജ് അധികൃതർ ഭീഷണിപ്പെടുത്തിയതായി വിദ്യാർത്ഥിനികൾ പറയുന്നു.

റിത റാണിൻഗ എന്ന് പേരുള്ള പ്രിൻസിപ്പൽ കുട്ടികളെ അപമാനിക്കുന്ന തരത്തിലുള്ള ഈ പരിശോധനയ്ക്ക് നേതൃത്വം നൽകുകയായിരുന്നു. രാജ്യത്തിനാകമാനം നാണക്കേടുണ്ടാക്കിയ സംഭവം നടന്ന കോളേജ് കച്ച് സർവകലാശാലയ്ക്ക് കീഴിലാണ് പ്രവർത്തിക്കുന്നത്. കോളേജിൽ ആകെ ആയിരത്തി അഞ്ഞൂറോളം വിദ്യാർത്ഥികളാണ് പഠിക്കുന്നത്. ഇക്കൂട്ടത്തിലുള്ള, ഹോസ്റ്റലിൽ താമസിച്ചുകൊണ്ട് പഠനം നടത്തുന്ന, സാമ്പത്തിക സ്ഥിതിയിൽ പിന്നോക്കമായ 68 വിദ്യാർത്ഥിനികളാണ് അപമാനിക്കപ്പെട്ടവർ. സംഭവത്തിൽ അന്വേഷണത്തിന് ഉത്തരവിട്ടതായി കച്ച് സർവകലാശാല അറിയിച്ചു.

കഴിഞ്ഞ കുറച്ച് കാലങ്ങളായി ഈ ഹോസ്റ്റലിനകത്തായി ഇത്തരത്തിലുള്ള വിവേചനങ്ങൾ നടക്കുന്നുവെന്ന പരാതികൾ പുറത്ത് വന്നിരുന്നു. ആർത്തവമുള്ള പെൺകുട്ടികൾ ഹോസ്റ്റലിലും മറ്റ് സ്ഥലങ്ങളിലും പോകുന്നു, കോളേജിനടുത്തതായി സ്ഥിതി ചെയ്യുന്ന ക്ഷേത്രത്തിനടുത്തേക്ക് വിദ്യാർത്ഥിനികൾ പോകുന്നു, എന്നും മറ്റുമുള്ള ആരോപണങ്ങൾ ഹോസ്റ്റൽ വാർഡൻ ഉന്നയിച്ചിരുന്നു. ഇതാണ് കോളേജ് അധികൃതർ ഇത്തരത്തിൽ ഒരു തീരുമാനത്തിലേക്ക് എത്തുന്നതിൽ കലാശിച്ചത്. പരിശോധിക്കാനായി അധികൃതർ എത്തിയപ്പോൾ രണ്ട് വിദ്യാർത്ഥിനികൾ പരിശോധനയിൽ നിന്നും മാറി നിൽക്കുകയും തങ്ങൾക്ക് ആർത്തവമുണ്ടെന്ന് പറയുകയും ചെയ്തിരുന്നു.